Փետրուար 2013-էն սկսեալ Ռազմիկ Փանոսեան Գալուստ Կիւլպէնկեան Հիմնարկութեան Հայկական Համայնքներու Բաժանմունքի տնօրէնն է։

Ան ծնած է Լիբանան եւ պատանի տարիքին գաղթած է Գանատա։ Ապրած է Գանատայի ֆրանսախօս եւ անգլիախօս շրջաններուն եւ Անգլիոյ մէջ։ Դոկտորականը ստացած է Լոնտոնի LSE համալսարանէն. անոր աւարտաճառը Բրիտանիոյ Political Studies Association-ի կողմէ ստացած է Lord Bryce Միացեալ Թագաւորութեան լաւագոյն համեմատական եւ միջազգային քաղաքականութիւն աւարտաճառ մրցանակը (2001)։ Մագիստրոսը ստացած է Թորոնթոյի Եօրք համալսարանէն իսկ համալսարանական առաջին վկայականը Մոնթրէալի Մըքկիլ համալսարանէն։   

Դասաւանդած է համեմատական քաղաքականութիւն, յետ-Սովետական անցում եւ ժողովրդավարութիւն, ազգայնական հակամարտութիւն, եւ այլ նիւթեր Լոնտոնի School of Oriental and African Studies-ի եւ London School of Economics-ի մէջ։

2004-ին ժողովրդավարութեան եւ մարդու իրաւունքներու նուիրուած գանատական պետական հաստատութեան մէջ՝ International Centre for Human Rights and Democratic Development, ստանձնած է Ռազմավարութեան, ծրագրումի եւ նախագծումի բաժինի տնօրէնի պաշտօնը։ Ղեկավարած է հաստատութեան Լատին Ամերիկայի, Ափրիկէի, Միջին Արեւելքի եւ Ասիոյ վերաբերող միջազգային ծրագրաւորումը։ Աշխատանքի բերումով ճամբորդած է զանազան երկիրներ, ներառեալ՝ Աֆղանիստան, Չինաստան, Հաիթի, Քոլոմպիա, Եգիպտոս, Մարոք եւ Քոնկո։ 2010-էն 2012-ի միջեւ աշխատած է որպէս միջազգային խորհրդատու, ներառեալ Նիւ Եորք՝ UNDP-ի համար։

Բազմաթիւ դասախօսութիւններ եւ հետազօտութիւններ ներկայացուցած է աշխարհի տարբեր տեղեր. հայկական ազգային ինքնութեան եւ ազգայնականութեան, ինչպէս նաեւ Հայաստան-Սփիւռք յարաբերութիւններու վերաբերեալ զանազան ակադեմական յօդուածներ հրատարակած է։

Ռազմիկ Փանոսեան հեղինակն է՝ The Armenians: From Kings and Priests to Merchants and Commissars (Columbia University Press/Hurst & Co., 2006) գիրքին։