Մարթին Սարգիս Էսաեան Գալուստ Սարգիս Կիւլպէնկեանի ծոռն է։

2005-էն սկսեալ ան Գալուստ Կիւլպէնկեան Հիմնարկութեան հոգաբարձու է եւ իր հօրմէն՝ Միքայէլ Էսաեանէն, ստանձնած է Հիմնարկութեան Անգլիոյ մասնաճիւղի եւ Հայկական Համայնքներու Բաժանմունքի պատասխանատուութիւնը։ Մարթին Էսաեան նաեւ հոգաբարձու է Լոնտոնի Սբ. Սարգիս բարեսիրական հիմնադրամին, որ հիմնուած է Գալուստ Կիւլպէնկեանի կողմէ. կառոյցին նպատակն է սատարել այն երկու կառոյցներուն որոնք հիմնադրուած են Կիւլպէնկեանի կողմէ՝ Լոնտոնի Սբ. Սարգիս Եկեղեցին եւ Երուսաղէմի Կիւլպէնկեան գրադարանը։

Մարթին Էսաեան ուսանած է Իթոն Քոլէճ (1972-1977), ապա Քէմպրիճի համալսարան (ճարտարագիտութիւն՝ Էմանուէլ Քոլէճ, 1978-81) եւ Հարվըրտի համալսարան (MBA, 1986-88)։ 1981-էն 1986 Լոնտոնի մէջ աշխատած է IBM ընկերութեան համար որպէս թեքնաբանական համակարգերու ճարտարագէտ, օգնելով որ մեծ ընկերութիւններ մշակեն եւ իրագործեն թեքնաբանական լուծումներով ծրագիրներ։

Հարվըրտէն ետք, աշխատած է Boston Consulting Group-ի հետ (1988-2003), նաեւ որպէս բաժնետէր։ Մասնագիտացած է ելեւմտական ծառայութիւններու մէջ եւ աշխատակցած է Անգլիոյ, Եւրոպայի եւ Ամերիկայի շատ մը ելեւմտական կարեւոր հաստատութիւններու համար։ Ղեկավարած եւ խորհրդատուական ծառայութիւններ մատուցած է Եւրոպական ելեւմտական հաստատութիւններու մէջ ամենայաջող բարեփոխումի ծրագիրներուն համար։